قسم آهي (ڪافرن جو ساهه) سختيءَ سان ڪڍندڙ (فرشتن) جو .

جيڪي (مؤمنن جو) آرام سان ساهه ڪڍن ٿا.

هو (الله تعالى جي حڪم سان ڪائنات ۾) تيزيءَ سان ڦرندا رهن ٿا.

ذميدارين کي پورو ڪرڻ لاءِ هڪ ٻئي کان اڳتي وڌڻ جي ڪوشش ۾ لڳل هوندا آهن.

(الله تعالى جي حڪم مطابق) ڪائنات جو سمورو نظام هلائين ٿا.

جنھن ڏينھن زمين زور سان ڌُڏندي.

وري ان کان پوءِ ٻيھر لوڏا کائيندي.

ان ڏينھن ڪيتريون ئي دليون خوف کان ڏڪي وينديون.

انهن جون اکيون ڪومائجي (يعني جهڪيل ٿي) وينديون.

(ڪافر) چون ٿا ته ڇا اسان کي (ٻيهر جيئرو ڪري) ساڳي حالت ۾ موٽايو ويندو؟

جڏهن اسان ڳريل سڙيل هڏا ٿي وينداسين (پوءِ به موٽايو ويندو)

وڌيڪ چون ٿا ته اها واپسي ته ڏاڍي نقصان واري چئبي.

بيشڪ اُها ته هڪ رَڙِ هوندي.

(جنهن جي نتيجي ۾) سڀ اُتي جو اُتي کليل ميدان ۾موجود هوندا.

ڇا توهان وٽ موسى ($) جو واقعو پھتو آهي؟

جڏهن سندس پالڻھار کيس طوى جي پاڪ واديءَ ۾ سڏيو.

(۽ کيس حڪم ڪيو ته) فرعون ڏي وڃ. بيشڪ هو بغاوت تي لهي آيو آهي.

کيس چؤ ته: ڇا تون سڌرڻ جو ارادو رکين ٿو؟

۽ مان تنھنجي پالڻھار ڏي تنهنجي رهنمائي ڪرڻ لاءِ تيار آهيان ته جيئن تنھنجي اندر (ان جو) خوف پيدا ٿئي.

(اطمينان ڏيارڻ خاطر) پوءِ موسى ($) کيس وڏيون نشانيون ڏيکاريون.

پر هُن موسى ( $ کي) ڪوڙو ڪيو ۽ نافرماني تي لهي آيو.

(هدايت وارين ڳالهين کي) پٺي ڏنائين ۽ (ان جي خلاف) چال بازيون ڪرڻ لڳو.

پوءِ ماڻهن کي گڏ ڪري چيائين.

مان ئي توهان جو سڀ کان وڏو پالڻھار آهيان.

پوءِ الله تعالى کيس دنيا ۽ آخرت جي عذاب ۾ پڪڙي ورتو.

بيشڪ هن واقعي ۾ (پالڻھار کان) ڊڄڻ وارن لاءِ وڏي عبرت آهي.

ڇا توهان پيدا ڪرڻ ۾ ڏکيا آهيو يا آسمان؟ (ان ئي) آسمان کي بنايو.

ان جي ڇت بلند ڪئي ۽ ان جو توازن قائم رکيو.

ان جي رات کي اونداهون ڪيو ۽ (ان مان) روشنيءَ کي ظاهر ڪيو.

ان کان پوءِ زمين کي وڇايو.

پوءِ ان جي اندران پاڻي ۽ گاهه ڪڍيو.

۽ ان ۾ جبل کوڙيائين.

(اهو سڀ ڪجهه) توهان ۽ توهان جي جانورن جي فائدي لاءِ آهن.

پوءِ جڏهن تمام وڏي آفت برپا ٿيندي.

ان ڏينهن انسان پنھنجي عملن کي ياد ڪندو.

(هاڻي) هر ڏسڻ واري لاءِ دوزخ کي ظاهر ڪيو ويندو.

سو جنھن ماڻهو بغاوت ڪئي هوندي.

۽ دنيا جي زندگيءَ کي ترجيح ڏني.

ته بيشڪ دوزخ ئي (اُن جي) رهڻ جي جاءِ هوندي.

۽ جيڪو ماڻهو (دنيا جي زندگيءَ ۾) پنھنجي پالڻھار جي اڳيان بيهڻ کان ڊنو ۽ نفس کي (ناجائز) خواهشن کان روڪيندو رهيو.

ته پوءِ جنت ئي ان جي رهڻ جي جاءِ آهي.

(ماڻهو) توهان کان قيامت جي باري ۾ پڇن ٿا ته اُها ڪڏهن ايندي؟

پر ان جي ٻڌائڻ ۾ توهان جو ڪهڙو واسطو آهي؟

ان جو اصل علم توهان جي پالڻھار کي ئي آهي.

بيشڪ توهان ته ان کي ڊيڄارڻ وارا آهيو، جيڪو اُن جو خوف رکندو هجي.

جنھن ڏينھن اُهي ان کي ڏسندا ته (ايئن سمجهندا ته) ڄڻ ته هي هڪ شام يا هڪڙي صبح کان سواءِ دنيا ۾ رهيا ئي نه هئا.