پُڇن ڇا جا پار؟

پُڇن ڳَرِي ڳالھ جو،

اُهي آهِن اُن ۾، ڌُرِيون ڌارو ڌار،

سَچ پَچ سِگھو سَمجھندا، ته قِيامت ڪِهڙي ڪار،

وَرِي به سِگھو سَمجھندا، صَحِي سَماچار،

ڇا، ڪيون سون ڪِيَن زَمِين کي غالِيچو گُلزار؟،

۽ جَڙون ڪيوسون جَبَلن کي، ڪِل سان، ڪِل قطار،

۽ اُپايو سون آن کي، جوڙو، نَر ۽ نار،

۽ اَهنجِي نَنڊ اوهان لئي، ڪَئـِي سون بِه قرار،

۽ ڪَيوسون ڪارِي رات کي، پَهرَن پَهر چار،

۽ ڏِينهن ڪيوسون ڏيھ لئي، روشن روزگار،

پڻ اَڏياسون آن مٿان، سَت اُڀ سَخت اَپار،

۽ ڏيو ڪيو سون ڏيھ ۾، چَمڪندڙ چوڌار،

پڻ لاٿوسون لُطف سان، مَنجھان مينگھ مَلهار، پاڻي پوڄ پَٽن تي، نَمندڙ نارو نار،

ته ڪڍون ڪڻ اُنهِين سان، کارِيون کوڙ خرار، ساوڪ سَر زمين تي، اوڀڙ عجب اِسرار،

ويڙهيل وڻ، وڻن تان، برپٽ باغ وبهار،

ته اَوس ڏِينهن اِنصاف جو، ٻَڌل آھِ ٻيهار،

جِنهن ڏِينهن ڏَنڊ ۾ ڦوڪيو، حُڪم سانَ هيڪار، پوءِ ٽولن پُٺيان ٽوليون، نِڪرنديون نِروار،

۽ کُلِي اُڀ دَر ٿئي، اَچ وَڃ لئي اِظهار،

۽ هَلَن جَبَل جھان جا، رُڃَّ جي رَفتار،

بيشڪ باھ بُڇڙن لئي، آهي اِنتظار،

جٽادار، جنهن ۾،

هُوندا سال هزار،

پاڻي پَڪ نه اُن ۾، ۽ نَه بَرف چکن بَدڪار،

ڌاران گَرم گند جي، جو بِلڪل بَدبُوءِ دار،

بَدلو سو بَديَن جو، پُورا پُورا پار،

هرگز حرف حساب جو، سي وَٺندا نه هُئا وِيچار،

ڪوٺيون ڪوڙيون آيتون، اَسان جون اِظهار،

قابو ڪيو سون ڪِتاب ۾، هر شئ جو شُمار،

پوءِ دائـِم دَرد دوزخ ۾، کائو خُوب خوار!، پوءِ آن کي ري آزار، ٻِيو ذرو زياده نه ڏِيون.

بيشڪ نيڪ بندن لئي، آهِن باغ، بُستان،

عاليشان انگور ڪَئـِين،

جيڏيون نوجوان،

پڻ پوڻيان پُر پلٽندڙ، پيالا پيمان،

ڪَچِي، ڪُوڙِي اُن ۾، ڪَنِين ٻُڌندا ڪانه،

پالي پارَ وَٺڻ ري،

ڀُونيون، اُڀ، ڪِ اُنهن ۾، جِن جا آهِن آستان، سي راڄ سَڀئـِي رَحمان، ڪُڇِي سَگھندا ڪِين ڪِي، بِلڪل بَند زبان،

رُوح، مَلڪ جِنهن مَهل ۾، هُوندا سَڀ حيران، بِيهن صِفون، صفون ڪري، سامهان، کي سُبحان، ڪير نه ڪُڇي اُن وَٽِ، ماٺ مِڙئـِي ميدان، مگر موڪل جِنهن کي ڏِئي، مالِڪ مِهربان، ۽ سَئون سَنواٽو سو چَئي، ٻِيو سڀ بَند بيان،

آهي اُهوئـِي ڏِينهن سَچو، مَنڊبو جِت مِيزان، پوءِ جنهن کي وَڻي سو وَٺي، پَنهنجي مالِڪ وَٽ مَڪان،

آن کي اوڏي ساڙ جو، اَسان ڪيو اِعلان، ڏِسندو جِنهن ڏِينهن ۾، اَکيَنِ سان اِنسان، جيڪِي اُماڻيو اڳڀرو، سَندسِ هَٿن سامان، ۽ ڪافِر قيد قِيام ۾، اورِيندو اَرمان، جيڪس مَنجھ جَھان، مِٽِي هُجان ها مُورِهين!!