اي پيغمبر (پنھنجي اُمت کي چؤ ته اوھين) جڏھن زالن کي طلاق ڏيڻ جو ارادو ڪريو تڏھن کين عِدت (جي شروع) ۾ طلاق ڏيو ۽ عِدَّت ڳڻيو، ۽ پنھنجي پالڻھار الله کان ڊڄو، کين سندن گھرن مان (عِدّت جي مُدّت ۾) پڌري بي حيائي جي ڪرڻ کانسواءِ نه ڪڍو ۽ (جڳائي ته) اُھي (پاڻ به) نه نڪرن، اھي الله جون (مُقرّر ڪيل) حدون آھن، ۽ جيڪو الله جون حدون (لتاڙي) لنگھندو تنھن بيشڪ پنھنجي جيءُ تي ظلم ڪيو، ڪوبه نه ڄاڻندو آھي ته اُن (طلاق ڏيڻ) کانپوءِ (متان) الله ڪو ٻيو رستو پيدا ڪري.(علامه تاج محمود امروٽي)

اي نبي (مسلمانن کي چئو ته) جڏهن اوهين زالن کي طلاق ڏيو ته انهن کي سندن عدت (جي مناسبت) تي طلاق ڏيو ۽ عدت کي ڳڻيندا رهو ۽ پنهنجي پاليندڙ الله کان ڊڄو. انهن کي سندن گهرن مان (عدت جي مدت ۾) پڌري بيحيائي جي ڪم سرزد ٿيڻ کان سواءِ، ٻاهر نه ڪڍو ۽ نه اهي پاڻ ٻاهر نڪرن ۽ اهي الله جون حدون (۽ قانون) آهن، ۽ جيڪو الله جي حدن کان لگهندو ته ان (سان اڳلي کي به نقصان پهچندو ۽ ان) پنهنجي نفس تي (به) ظلم ڪيو، (ڇو ته) اهو نٿو ڄاڻي ته متان الله ان (طلاق ڏيڻ) کان پوءِ ڪا (ميلاپ جي) نئين ڳالهه پيدا ڪري.(علامه علي خان ابڙو)

اي نبي ڪريم (توهان امت کي ٻُڌايو ته) جڏهن توهان عورتن کي طلاق ڏيڻ جو ارادوڪريو، پوءِ توهان انهن کي انهن جي پاڪائيءَ ۾ طلاق ڏيو ۽ توهان عدت جو اندازو ڪريو، ۽ توهان پنهنجي خالق، الله کان ڊڄو، توهان انهن کي پنهنجي گھرن مان نه ڪڍو ۽ نه اهي پاڻ نڪرن مگر جو اهي صاف بي حيائي آڻين، ۽ اهي الله جون حدون آهن، ۽ جيڪو ماڻهو الله جي حدن کان وڌي ٿو پوءِ بيشڪ ان پاڻ سان ظلم ڪيو، توهان نٿا ڄاڻو شايد الله تعالى انهيءَ کان پوءِ ڪو نئون حڪم موڪلي(علامه عبدالوحيد جان سرهندي)

اي رسول (مسلمانن کي چئو ته) جڏهن اوهين پنهنجين زالن کي طلاق ڏيو ته انهن جي عدت (پاڪائي) جي وقت طلاق ڏيو ۽ عدت جو ڳاڻاٽو رکو ۽ پنهنجي پروردگار خدا کان ڊڄو ۽ (عدت اندر) انهن جي گهرن مان کين نه ڪڍو ۽ اهي پاڻ به گهر کان ٻاهر نه نڪرن پر جڏهن پڌري بيحيائيءَ جو ڪم ڪري وهن (ته پوءِ ڪڍڻ ۾ مذائقه نه آهي) ۽ اهي خدا جون مقرر ڪيل حدون آهن. ۽ جو خدا جي حدن کان لنگهي ويندو ته ان پنهنجو پاڻ تي ظلم ڪيو. تون نه ٿو ڄاڻين شايد خدا ان کان پوءِ ڪا ڳالھ پيدا ڪري (جنهن کان مڙس پڇتائي ۽ وري ملي وڃن).(سيد فرمان علي)

اي نبي! جڏهن طلاق ڏيو عورتن کي پوءِ طلاق ڏيو انهن کي سندن عدت جي وقت کي لحاظ ۾ رکندي ۽ ڊڄو الله پنهنجي رب کان نه ڪڍو انهن کي سندن گهرن مان ۽ نه نڪرن پاڻ مگر هي جو آڻين برائي پڌري ۽ اهي الله جون حدون آهن ۽ جيڪو تجاوز ٿو ڪري الله جي حدن کان پوءِ تحقيق ظلم ڪيائين پنهنجي نفس تي نه ٿو ڄاڻين تون ته (متان) الله پيدا ڪري ان کان پوءِ ڪو امر .(مولانا محمد ادريس ڏاهري)

اي نبي ﷺ! (مسلمانن کي چئو ته) جڏهن اوهين زالن کي طلاق ڏيو ته انهن کي سندن عدّت تي طلاق ڏيو ۽ عدت کي ڳڻيندا رهو. ۽ پنهنجي پاليندڙ الله کان ڊڄو، انهن کي سندن گهرن مان (عدت جي مدت ۾ ) پڌري بي حيائي جي ڪم ڪرڻ کان سواءِ ٻاهر نه ڪڍو ۽ نه اهي پاڻ ٻاهر نڪرن. ۽ اهي الله جون حدون آهن. ۽ جيڪو الله جي حدن کان لنگهندو ته ان پنهنجي نفس تي ظلم ڪيو (ڇو ته) اهو نه ٿو ڄاڻي ته متان الله ان (طلاق ڏيڻ) کانپوءِ ڪا (ملاپ جي) جي نئين ڳالهه پيدا ڪري. (مولانا محمد مدني)

پوءِ جڏھن (طلاق واريون) پنھنجي مُدّت کي پھچن تڏھن چڱي طرح سان کين رکو يا چڱي طرح سان کين ڇڏي ڏيو ۽ پاڻ مان ٻه معتبر شاھد ڪريو ۽ الله لڳ شاھدي پوري ڏيو، انھيءَ (حُڪم) سان انھيءَ کي نصيحت ڏجي ٿي جيڪو الله ۽ قيامت جي ڏينھن کي مڃيندو ھجي ۽ جيڪو الله کان ڊڄندو تنھن جي نڪرڻ جي (الله) ڪا واھ ڪندو.(علامه تاج محمود امروٽي)

پوءِ جڏهن اهي (زالون) پنهنجي (عدت واري) مدي کي پهچن ته رواج (۽ قانون) موجب انهن کي (رجوع ڪرڻ سان يا نئين نڪاح سان) جهليو (۽ زال مڙس جي زندگي گهاريو) يا رواج موجب انهن کان جدا ٿيو ۽ (آخري فيصلي تي) پاڻ مان اعتبار وارن ٻن ڄڻن کي شاهد ڪريو ۽ الله جي واسطي (ڪنهن جي روءِ رعايت ڪرڻ کان سواءِ) پوري شاهدي ڏيو. هن (حڪم) سان ان کي نصيحت ڪئي وڃي ٿي جيڪو الله ۽ قيامت جي ڏينهن کي مڃي ٿو، ۽ جيڪو الله (جي قانون جو لحاظ رکي ان) کان ڊڄندو ته الله ان لاءِ مشڪل مان نڪرڻ جو رستو پيدا ڪري ڏيندو.(علامه علي خان ابڙو)

پوءِ جڏهن انهن جي عدت پوري ٿيڻ جي قريب ٿئي، پوءِ انهن کي نيڪيءَ سان روڪيو يا نيڪيءَ سان انهن کي جدا ڪريو ۽ توهان پاڻ (مسلمانن مان) ٻه انصاف وارا شاهد مقرر ڪريو ۽ توهان خدا ڪارڻ شاهدي ڏيو، اها ان ماڻهو لاءِ نصيحت ڪئي وڃي ٿي جيڪو الله تعالى ۽ قيامت تي ايمان رکي ٿو، ۽ جيڪو ماڻهو الله تعالى کان خوف ڪري ٿو، الله ان لاءِ نجات جو رستو پيدا ڪري ٿو(علامه عبدالوحيد جان سرهندي)

پوءِ جڏهن اهي پنهنجي عدت پوري ڪرڻ جي ويجهو پهچن ته يا ته کين سٺي نموني وهاري ڇڏيو يا چڱي نموني ۾ کين رخصت ڪري ڇڏيو ۽ (طلاق ڏيڻ وقت) پنهنجن ماڻهن مان ٻه عادل شاهد رکو ۽ (شاهدو!) اوهين خدا جي واسطي پوري پوري شاهدي ڏجو. انهن ڳالهين سان ان شخص کي نصيحت ڪئي ٿي وڃي جو خدا ۽ ڏينهن قيامت تي ايمان ٿو رکي ۽ جيڪو خدا کان ڊڄندو ته خدا (به) ان جي لاءِ ڇوٽڪاري جي (ڪا نه ڪا) صورت ڪڍندو.(سيد فرمان علي)

پوءِ جڏهن پهچن مدي پنهنجي کي پوءِ روڪي رکو انهن کي ڀلائيءَ سان يا جدا ڪيو انهن کي ڀلائيءَ سان ۽ شاهد ڪيو ٻن عدل جي صاحبن کي پاڻ مان ۽ قائم ڪيو شاهدي الله جي لاءِ اهو نصيحت ڪيو وڃي ٿو ان سان اهو جو ايمان آڻي ٿو الله تي ۽ قيامت جي ڏينهن تي ۽ جيڪو ڊڄي ٿو الله کان ته بنائي ٿو ان جي لاءِ نڪرڻ جي جاءِ .(مولانا محمد ادريس ڏاهري)

پوءِ جڏهن اهي (زالون) پنهنجي مدي کي پهچن ته رواج موجب انهن کي جهليو يا رواج موجب انهن کان جدا ٿيو ۽ پاڻ مان اعتبار وارن ٻن ڄڻن کي شاهد ڪريو ۽ الله جي واسطي پوري شاهدي ڏيو. هن (حڪم) سان ان کي نصيحت ڪئي وڃي ٿي، جيڪو الله ۽ قيامت جي ڏينهن کي مڃي ٿو. ۽ جيڪو الله کان ڊڄندو ته الله ان لاءِ مشڪل مان نڪرڻ جو رستو پيدا ڪري ڏيندو. (مولانا محمد مدني)

۽ کيس اُتاھون روزي ڏيندو جتان گمان ئي نه ھوندس، ۽ جيڪو الله تي ڀروسو ڪندو تنھن کي الله ڪافي آھي، بيشڪ الله پنھنجي ڪم کي پورو ڪندڙ آھي، بيشڪ الله سڀڪنھن شيءِ جو اندازو ڪيو آھي.(علامه تاج محمود امروٽي)

(ان مسئلي ۾ مالي مشڪلاتون آيس ته) ان کي اتان روزي ڏيندو جتان گمان به نه هوندس ۽ جيڪو الله تي ڀروسو ڪندو ته الله ان (جي ساٿ ڏيڻ) لاءِ ڪافي آهي. بيشڪ الله پنهنجي ڪم کي (پنهنجي قانون سان) پورو ڪرڻ وارو آهي. الله سڀ ڪنهن شيء جو اندازو ڪري ڇڏيو آهي.(علامه علي خان ابڙو)

۽ ان کي اهو اتان رزق عطا ڪري ٿو جتان پاڻ گمان نٿو رکي ۽ جيڪو ماڻهو الله تعالى تي توڪل ڪري ٿو پوءِ اهو ان لاءِ (ٻنهي جهانن ۾) ڪافي آهي، بيشڪ الله تعالى پنهنجو حڪم جاري ڪندڙ آهي، بيشڪ الله تعالى هر شيءِ لاءِ اندازو مقرر ڪيو آهي(علامه عبدالوحيد جان سرهندي)

۽ ان کي اهڙيءَ جاءِ تان رزق ڏيندو جتان کيس گمان به نه هوندو ۽ جنهن خدا تي ڀروسو ڪيو ته اهو ان لاءِ ڪافي آهي. بيشڪ خدا پنهنجي ڪم کي پورو ڪندو آهي. خدا هر ڳالھ جو هڪ اندازو مقرر ڪري ڇڏيو آهي.(سيد فرمان علي)

۽ رزق ڏئي ٿو ان کي ان جاءِ کان جو نه ٿو گمان ڪري ۽ جيڪو توڪل ڪري ٿو الله تي پوءِ اهو ڪافي آهي ان جي لاءِ بيشڪ الله پهچائيندڙ آهي پنهنجي امر کي تحقيق ڪيو الله هر شيءِ جي لاءِ هڪ اندازو .(مولانا محمد ادريس ڏاهري)

۽ ان کي اتان روزي ڏيندو جتان گمان به نه هوندس ۽ جيڪو الله تي ڀروسو ڪندو ته الله ان لاءِ ڪافي آهي. بيشڪ الله پنهنجي ڪم کي پورو ڪرڻ وارو آهي. الله سڀڪنهن شيءِ جو اندازو ڪري ڇڏيو آهي. (مولانا محمد مدني)

۽ اوھان جي (طلاق ڏنل) زالن مان جيڪي حيض کان نااُميد ٿيون ھجن (تن جي عِدّت بابت) جيڪڏھن شڪ ۾ پيا آھيو ته انھن جي عِدّت ٽي مھينا آھي ۽ جيڪي اڃا حيض واريون نه ٿيون آھن (تن جي به)، ۽ پيٽ وارين زالن جي عِدّت اِھا آھي جو ٻار ڄڻين، ۽ جيڪو الله کان ڊڄندو تنھن لاءِ الله سندس ڪم ۾ آساني ڪندو.(علامه تاج محمود امروٽي)

۽ جيڪي اوهان جي زالن مان حيض اچڻ کان نااميد ٿيون هجن (تن جي عدت بابت) جيڪڏهن شڪ ۾ پيا آهيو ته سندن عدت ٽي مهينا آهي ۽ ( (اهڙيءَ طرح) اهي زالون جن کي حيض نه آيو هجي (تن جي عدت به ٽي مهينا شمار ڪريو) ۽ پيٽ وارين زالن جي عدت پنهنجي ٻار ڄڻڻ تائين آهي. ۽ جيڪو الله (جي قانونن تي هلي ان) جو لحاظ رکندو ته الله سندس ڪم کي آسان ڪري ڇڏيندو.(علامه علي خان ابڙو)

۽ توهان جي عورتن مان جن کي حيض نٿو اچي، جيڪڏهن توهان کي انهن جي (عدت ڳڻڻ ۾) مشڪل پيش اچي پوءِ انهن جي عدت ٽي مهينا آهي، ۽ انهن عورتن جي لاءِ جن کي اڃان حيض نه آيو هجي، ۽ حمل وارين عورتن لاءِ عدت هي آهي جو اهي پنهنجا ٻار ڄڻن. ۽ جيڪو ماڻهو الله تعالى کان خوف ڪري ٿو الله تعالى ان جي ڪم ۾ آساني پيدا ڪري ٿو(علامه عبدالوحيد جان سرهندي)

۽ جي زالون حيض کان نا اميد ٿي چڪيون جيڪڏهن تو کي (انهن جي باري ۾) شڪ هجي ته انهن جي عدت ٽي مهينا آهي ۽ (اهڙي طرح) اهي زالون جن کي حيض ٿيو ئي نه آهي. ۽ پيٽ وارين عورتن جي عدت آهي ٻار ڄڻڻ تائين. ۽ جيڪو خدا کان ڊڄندو رهي ٿو خدا ان جي ڪم ۾ سهولت پيدا ڪندو.(سيد فرمان علي)

۽ اهي جيڪي مايوس ٿيون حيض کان اوهان جي عورتن مان جيڪڏهن شڪ ڪيو اوهان پوءِ انهن جي عدت ٽي مهينا آهي ۽ انهن جي جيڪي حيض واريون نه ٿيون ۽ حمل واريون عورتون مدو انهن جو هي آهي جو ڄڻين حمل پنهنجا ۽ جيڪو ڊڄي ٿو الله کان ته ڪندو ان جي لاءِ پنهنجي امر مان آساني .(مولانا محمد ادريس ڏاهري)

۽ جيڪي اوهان جن زالن مان حيض اچڻ کان نااميد ٿيون هجن (تن جي عدت بابت) جيڪڏهن شڪ ۾ پيا آهيو ته سندن عدت ٽي مهينا آهي ۽ (اهڙيءَ طرح) اهي زالون جن کي حيض نه آيو هجي (تن جي عدت به ٽي مهينا آهي) ۽ پيٽ وارين زالن جي عدت پنهنجي ٻار ڄڻڻ تائين آهي. ۽ جيڪو الله کان ڊڄندو ته الله سندس ڪم کي آسان ڪري ڇڏيندو. (مولانا محمد مدني)

اھو الله جو حُڪم آھي جو اوھان ڏانھن ڏانھن نازل ڪيائين، ۽ جيڪو الله کان ڊڄندو تنھن جون مدايون الله کانئن ميٽيندو ۽ ان کي اجر وڌيڪ ڏيندو.(علامه تاج محمود امروٽي)

اهو الله جو حڪم آهي ان کي اوهان جي طرف نازل ڪيو اٿس. ۽ جيڪو الله کان ڊڄندو ته الله ان (ڪم ۾ پيش ايندڙ ڏکيائيون ۽ مدايون ان کان پري ڪندو ۽ ان کي وڏو اجر ڏيندو.(علامه علي خان ابڙو)

اهو الله جو حڪم آهي جنهنکي توهان ڏانهن نازل ڪيو اٿس ۽ جيڪو ماڻهو الله تعالى کان خوف ڪري ٿو الله تعالى ان سان سندس ڪيل گناه ميٽي ٿو ۽ ان لاءِ اجرِ عظيم آهي(علامه عبدالوحيد جان سرهندي)

اهو خدا جو حڪم آهي جيڪو ان اوهان تي نازل ڪيو آهي ۽ جو خدا کان ڊڄندو رهندو ته ان جا گناھ ان کان پري ڪندو ۽ کيس وڏو درجو ڏنو ويندو.(سيد فرمان علي)

اهو الله جو امر آهي نازل ڪيائين ان کي اوهان ڏانهن ۽ جيڪو ڊڄي ٿو الله کان ته ميٽي ڇڏيندو ان کان برايون ان جون ۽ وڏو ڪندو ان جي لاءِ ثواب .(مولانا محمد ادريس ڏاهري)

اهو الله جو حڪم آهي ان کي اوهان جي طرف نازل ڪيو اٿس. ۽ جيڪو الله کان ڊڄندو ته الله ان جون برايون ان کان پري ڪندو ۽ ان کي وڏو اجر ڏيندو. (مولانا محمد مدني)

جتي پنھنجي وس آھر (اوھين) ٽڪندا آھيو تتي انھن کي (عدت جا ڏينھن) ٽڪايو ۽ کين ھن لاءِ نه ايذايو ته انھن کي تنگ ڪريو، ۽ جيڪڏھن پيٽ سان ھجن ته جيسين پنھنجو ٻار ڄڻين (تيسين) کين خرچ ڏيو، پوءِ جيڪڏھن اوھان جي حُڪم موجب (اُھي ٻار کي) کير پيارين ته کين سندن مزوري ڏيو، ۽ ھلي چليءَ موجب پاڻ ۾ صلاح ڪريو، ۽ جيڪڏھن پاڻ ۾ سختي ڪريو ته اُن کي ٻي (ڪا) کير پياري.(علامه تاج محمود امروٽي)

اوهين انهن (زالن) کي اتي رهايو جتي پنهنجي طاقت آهر پاڻ رهيا پيا آهيو. ۽ انهن کي تنگ ڪرڻ لاءِ نه ايذايو، ۽ جيڪڏهن پيٽ سان هجن ته انهن کي خرچ ڏيو، جيستائين پنهنجو ٻار ڄڻين. پوءِ جيڪڏهن اوهان جي لاءِ (ٻار کي) کير پيارين ته کين سندن اجرت ڏيو! ۽ رواج موجب (انهن معاملن تي) پاڻ ۾ صلاح مشورو ڪريو، ۽ جيڪڏهن (ان ڳالهه تي) اتفاق نه ٿئي ته پوءِ (ٻار کي) ڪا ٻي (عورت) کير پياريندي.(علامه علي خان ابڙو)

توهان انهن عورتن کي انهن جاين (گهرن) تي رهايو جتي توهان پاڻ پنهنجي توفيق آهر رهو ٿا. ۽ توهان انهن کي تڪليف نه پهچايو جو انهن تي تنگي ٿئي، ۽ جيڪڏهن اهي عورتون حمل سان آهن پوءِ توهان انهن کي خرچ ڏيو (ماني ٽڪي وغيره) ايستائين جو اهي ٻار ڄڻين، پوءِ جيڪڏهن اهي توهان جي ٻارن کي کير پيارين پوءِ توهان انهن کي سندن اجورو ڏيو، ۽ انهيءَ لاءِ توهان پاڻ ۾ نيڪيءَ سان صلاح مشورو ڪريو، ۽ جيڪڏهن توهان جي پاڻ ۾ ڪشمڪش پيدا ٿئي پوءِ فوراً ان ٻار کي ٻي عورت کير پياري(علامه عبدالوحيد جان سرهندي)

طلاق ڏنل زالن کي (عدت پوري ٿيڻ تائين) پنهنجي حال مطابق اتي ئي رکو جتي اوهين پاڻ رهو ٿا ۽ انهن کي تنگ ڪرڻ تڪليف نه پهچايو ۽ جي پيٽ سان آهن ته ويم تائين کين خرچ (پکو) ڏيندا رهو. ۽ (ويم کان پوءِ) جيڪڏهن اهي ٻار کي اوهان جي خاطر ٿڃ پيارين ته کين انهن جي (مناسب) اجرت ڏئي ڇڏيو ۽ پاڻ ۾ دستور وانگر ڳالهايو ٻولهايو جيڪڏهن اوهين صفا بيزار آهيو ته ٻار کي سندس (پيءُ) جي خاطر ڪا ٻي عورت ان کي ٿڃ ڏيندي.(سيد فرمان علي)

رهايو انهن کي جتي پاڻ رهو پيا پنهنجي طاقت مان ۽ نه نقصان ڏيو انهن کي تانته تنگي ڪيو انهن تي ۽ جيڪڏهن هجن حمل واريون ته پوءِ خرچ ڪيو انهن تي تانجو ڄڻين حمل پنهنجا پوءِ جيڪڏهن کير پيارين (اولاد کي) اوهان جي لاءِ پوءِ ڏيو انهن کي اجورو انهن جو ۽ صلاح ڪيو پاڻ ۾چڱائيءَ سان ۽ جيڪڏهن هڪ ٻئي مان تنگ ٿي پئو پوءِ جلد کير ڏيندي ان جي لاءِ ٻي .(مولانا محمد ادريس ڏاهري)

اوهين انهن (زالن) کي اتي رهايو جتي پنهنجي طاقت آهر پاڻ رهيا پيا آهيو. ۽ انهن کي تنگ ڪرڻ لاءِ نه ايذايو. ۽ جيڪڏهن پيٽ سان هجن ته انهن کي خرچ ڏيو جيستائين پنهنجو ٻار ڄڻين. پوءِ جيڪڏهن اوهان جي لاءِ (ٻار کي) کير پيارين ته کين سندن اجرت ڏيو! ۽ رواج موجب پاڻ ۾ صلاح ڪريو. ۽ جيڪڏهن اتفاق نه ٿئي ته پيءُ لاءِ (ٻار کي) ڪا ٻي کير پياريندي. (مولانا محمد مدني)

جڳائي ته وس وارو پنھنجي وس آھي خرچ ڪري، ۽ جنھن تي روزي تنگ ڪئي ويئي آھي تنھن کي جڳائي ته جيڪي الله کيس ڏنو آھي تنھن مان خرچ ڪري، ڪنھن کي الله تڪليف نه ڏيندو آھي پر (اوتري قدر) جيتري قدر کيس الله ڏنو آھي، سگھوئي الله ڏکيائيءَ کانپوءِ سکيائي ظاھر ڪندو.(علامه تاج محمود امروٽي)

(مطلقه جو خرچ يا کير پيارڻ جي لاءِ) ڪشادگيءَ وارو پنهنجي ڪشادگي آهر خرچ ڪري، ۽ جنهن جي آمدني ٿوري هجي ته اهو ان مان خرچ ڪري جيڪو الله ان کي ڏنو آهي. الله ڪنهن شخص کي تڪليف نٿو ڏئي، پر ان مطابق جيڪي ان کي ڏنو اٿس. (جيڪڏهن ان عمل سان وقتي تنگي ٿي ته) الله تنگيءَ کان پوءِ جلد آساني ڪري ڏيندو.(علامه علي خان ابڙو)

امير ماڻهو پنهنجي حيثيت مطابق (ٻار تي) خرچ ڪري، ۽ غريب ماڻهو پنهنجي پهچ آهر ان تي خرچ ڪري انهيءَ مان جيڪي ڪجھه ان کي الله رزق ڏنو آهي، نٿو تڪليف ڏئي الله ڪنهن انسان کي مگر سندس ڏني مطابق عنقريب، الله تعالى تنگيءَ کان پوءِ فراخي پيدا ڪندو(علامه عبدالوحيد جان سرهندي)

ڪشادگيءَ وارو پنهنجي ڪشادگيءَ آهر خرچ ڪري. ۽ جنهن جي آمدني ٿوري هجي ته اهو ان مان خرچ ڪري جو خدا کيس ڏنو آهي. خدا ڪنهن شخص کي تڪليف نه ٿو ڏئي پر ان مطابق جيڪي ان کي ڏنو اٿس. خدا تنگيءَ کان پوءِ جلد آساني ڪري ڏيندو.(سيد فرمان علي)

جڳائي ته خرچ ڪري وسعت وارو پنهنجي وسعت آهر ۽ اهو جو تنگ ڪيو ويو ان تي ان جو رزق پوءِ جڳائي ته خرچ ڪري ان مان جيڪو ڏنو ان کي الله نه ٿو تڪليف ڏئي الله ڪنهن نفس کي مگر اوترو جيڪو ڏنائين ان کي جلد ڪندو الله تنگيءَ کان پوءِ آساني .(مولانا محمد ادريس ڏاهري)

ڪشادگيءَ وارو پنهنجي ڪشادگيءَ آهر خرچ ڪري. ۽ جنهن جي آمدني ٿوري هجي ته اهو ان مان خرچ ڪري جو الله ان کي ڏنو آهي. الله ڪنهن شخص کي تڪليف نه ٿو ڏي پر ان مطابق جيڪي ان کي ڏنو اٿس. الله تنگي کان پوءِ جلد آساني ڪري ڏيندو. (مولانا محمد مدني)

۽ (اھڙا) گھڻائي ڳوٺ (ھوا) جن پنھنجي پالڻھار جي حُڪم ۽ سندس پيغمبرن (جي حڪم) کان نافرماني ڪئي پوءِ سخت عذاب سان انھن کي پڪڙيوسون ۽ سخت عذاب سان کين عذاب ڪيوسون.(علامه تاج محمود امروٽي)

۽ گهڻن ڳوٺن پنهنجي پاليندڙ ۽ سندس رسول جي (ٻڌايل اهڙن عائلي يا معاشرتي قانونن ۽) حڪم جي نافرماني ڪئي پوءِ اسان سندن سخت حساب ورتو ۽ کين سخت عذاب ڏنوسون.(علامه علي خان ابڙو)

۽ ڪيترائي ڳوٺاڻا هئا جن پنهنجي رب ۽ پنهنجي رسولن جي حڪمن جي نافرماني ڪئي پوءِ اسان انهن سان بيحد سخت حساب ڪيو، ۽ اسان انهن کي بيحد سخت عذاب ڪيو(علامه عبدالوحيد جان سرهندي)

۽ گهڻن ئي ڳوٺن (وارن) پنهنجي پروردگار ۽ سندس رسول جي حڪم جي نافرماني ڪئي ته اسان (به) انهن جو وڏي سختيءَ سان حساب ورتو ۽ انهن کي بڇڙي عذاب جي سزا ڏني.(سيد فرمان علي)

۽ ڪئين ڳوٺ بي فرمان ٿيا پنهنجي رب جي امر ۽ ان جي رسولن کان پوءِ حساب ڪيو اسان انهن سان حساب سخت ۽ عذاب ڪيوسون انهن کي عذاب برو .(مولانا محمد ادريس ڏاهري)

۽ گهڻن ڳوٺن پنهنجي پاليندڙ ۽ سندس رسولن جي حڪم جي نافرماني ڪئي پوءِ اسان سندن سخت حساب ورتو ۽ کين سخت عذاب ڏنوسون، (مولانا محمد مدني)

پوءِ انھن (ڳوٺ وارن) پنھنجي ڪم جي سزا چکي ۽ انھن جي ڪم جي پڇاڙي خراب ٿي.(علامه تاج محمود امروٽي)

پوءِ انهن پنهنجي (خدائي قانونن سان ٽڪراءُ ۾ هٿ ٺوڪين قانونن جي نتيجن ۽) ڪم جي سزا (جو مزو) چکيو ۽ سندن ڪم جي پڇاڙي نقصان ئي نقصان هو.(علامه علي خان ابڙو)

پوءِ انهن پنهنجي ڪَيَلَ جو وبال چکيو ۽ ان ڪم جي پڇاڙي نقصان واري ٿي(علامه عبدالوحيد جان سرهندي)

ته انهن پنهنجن ڪرتوتن جي سزا جو مزو چکيو، ۽ انهن جي ڪردار جي پڇاڙي نقصان (ئي نقصان) هو.(سيد فرمان علي)

پوءِ چکيائون پنهنجي امر جو وبال ۽ هئي پڇاڙي انهن جي امر جي نقصان واري .(مولانا محمد ادريس ڏاهري)

پوءِ انهن پنهنجي ڪم جي سزا (جو مزو) چکيو ۽ سندن ڪم جي پڇاڙي نقصان هو. (مولانا محمد مدني)

انھن لاءِ الله سخت عذاب تيار ڪيو آھي تنھنڪري اي عقل وارا مؤمنؤ الله کان ڊڄو، بيشڪ الله اوھان ڏانھن ھڪ نصيحت موڪلي آھي.(علامه تاج محمود امروٽي)

الله انهن لاءِ (آخرت ۾) سخت عذاب تيار ڪري رکيو آهي. پوءِ اي عقل وارا مومنو! الله کان ڊڄو! (۽ ان جي قانونن جي پاسخاطري رکو) الله اوهان ڏي هڪ ڪتاب (قرآن چٽا حڪم ڏئي) نازل ڪيو آهي.(علامه علي خان ابڙو)

اُنھن لاءِ الله سخت عذاب تيار ڪيو آھي، تنھنڪري اي عقل وارا مؤمنؤ! الله کان ڊڄو، بيشڪ الله اوھان ڏانھن ھڪ ڪتاب (يعني قرآن) نازل ڪيو آھي(علامه عبدالوحيد جان سرهندي)

خدا انهن لاءِ (آخرت ۾) سخت عذاب تيار ڪري رکيو آهي. ته اي عقل وارو! جي ايمان آڻي چڪا آهيو خدا کان ڊڄندا رهو خدا (ته) اوهان ڏي (پنهنجي) ياد قرآن موڪلي ڇڏيو آهي.(سيد فرمان علي)

تيار ڪيو الله انهن جي لاءِ عذاب سخت پوءِ ڊڄو الله کان اي عقل وارا! جن ايمان آندو تحقيق نازل ڪيوالله اوهان ڏانهن ذڪر، .(مولانا محمد ادريس ڏاهري)

الله انهن لاءِ (آخرت ۾ ) سخت عذاب تيار ڪري رکيو آهي. پوءِ اي عقل وارا مومنو! الله کان ڊڄو! الله اوهان ڏي هڪ ڪتاب (قرآن) نازل ڪيو آهي (مولانا محمد مدني)

جو رسول آھي جو اوھان تي الله جون پڌريون آيتون (ھن لاءِ) پڙھندو آھي ته جن ايمان آندو ۽ چڱا ڪم ڪيا تن کي اونداھين کان سوجھري ڏانھن ڪڍي، ۽ جيڪو الله تي ايمان آڻيندو ۽ چڱا ڪم ڪندو تنھن کي اھڙن باغن ۾ داخل ڪندو جن جي ھيٺان واھيون وھنديون آھن اُتي ھميشه رھندا، بيشڪ اُن جي روزي چڱي طرح ٺاھي آھي.(علامه تاج محمود امروٽي)

۽ هڪڙو اهڙو رسول (موڪليو اٿس) جو اوهان کي الله جون پڌريون آيتون پڙهي ٻڌائي ٿو ته جن ايمان آندو ۽ چڱا ڪم ڪيا تن کي اونداهين مان سوجهري ڏي ڪڍي ۽ جيڪو الله تي ايمان آڻيندو ۽ چڱا ڪم ڪندو ته الله ان کي اهڙن باغن ۾ داخل ڪندو جن جي هيٺان واهه پيا وهن انهن ۾ هميشه رهندا. بيشڪ الله ان جي روزي چڱي ڪئي آهي.(علامه علي خان ابڙو)

(۽) پيغمبر (بہ موڪليو اٿس) جو اوھان تي الله جون پڌريون آيتون (ھن لاءِ) پڙھندو آھي تہ جن ايمان آندو ۽ چڱا ڪم ڪيا تن کي (گمراھيءَ جي) اونداھين کان (ھدايت جي) سوجھري ڏانھن ڪڍي، ۽ جيڪو الله تي ايمان آڻيندو ۽ چڱا ڪم ڪندو، تنھن کي اھڙن باغن ۾ داخل ڪندو جن جي ھيٺان واھيون وھنديون آھن، اُتي ھميشہ رھندا، بيشڪ ان جي روزي چڱيءَ طرح ٺاھي آھي(علامه عبدالوحيد جان سرهندي)

(۽) پنهنجو رسول (به) جيڪو اوهان جي اڳيان پڌريون آيتون پڙهي ٿو هن لاءِ ته جن ايمان آندو آهي ۽ چڱا ڪم ڪندا رهيا تن کي (ڪفر جي) اونداهين مان ڪڍي (ايمان جي) روشنيءَ ڏي آڻي ۽ جن خدا تي ايمان آندو ۽ چڱا ڪم ڪيا ته خدا تنهن کي (بهشت جي) انهن باغن ۾ داخل ڪندو جن جي (وڻن) هيٺان نهريون جاري آهن ۽ اهي ان ۾ هميشه هميشه رهندا خدا انهن کي چڱي خاصي روزي ڏني آهي.(سيد فرمان علي)

رسول جيڪو تلاوت ٿو ڪري اوهان تي الله جون آيتون روشن تانته ڪڍي انهن کي جن ايمان آندو ۽ ڪيائون صالح عمل انڌيرن مان روشنيءَ ڏانهن ۽ جيڪو ايمان آڻي ٿو الله تي ۽ ڪري ٿوصالح عمل داخل ڪندو ان کي بهشتن ۾ جو وهن پيون هيٺان انهن جي نهرون رهندڙ هوندا انهن ۾ هميشہ تحقيق سهڻوڪيو الله ان جي لاءِ رزق .(مولانا محمد ادريس ڏاهري)

۽ هڪڙو اهڙو رسول (موڪليو اٿس) جو اوهان کي الله جون پڌريون آيتون پڙهي ٻڌائي ٿو ته جن ايمان آندو ۽ چڱا ڪم ڪيا تن کي اونداهين مان سوجهري ڏي ڪڍي. ۽ جيڪو الله تي ايمان آڻيندو ۽ چڱو ڪم ڪندو ته الله ان کي اهڙن باغن ۾ داخل ڪندو جن جي هيٺان واهه پيا وهن انهن ۾ هميشه رهندا. بيشڪ الله ان جي روزي چٽي ڪئي آهي. (مولانا محمد مدني)

الله اُھو آھي جنھن ستن آسمانن کي بڻايو ۽ اوتريون زمينون به، اُنھن جي وچ ۾ اُن جو حُڪم نازل ٿيندو آھي ته ڄاڻو ته الله سڀڪنھن شيءَ تي وس وارو آھي ۽ ته الله عِلم سان سڀڪنھن شيءِ کي وڪوڙيو آھي.(علامه تاج محمود امروٽي)

الله اهو آهي جنهن ست آسمان بنايا آهن ۽ انهن جهڙي زمين به. انهن جي وچ ۾ حڪم نازل ٿيندا رهن ٿا (۽ اهي حڪم الله جي انهن مقرر ڪيل قانونن تي ئي ٻڌل رهن آهن. اهو اوهان کي ان لاءِ ٻڌايو ويو) ته ته اوهين ڄاڻو ته الله سڀ ڪجهه ڪري سگهي ٿو ۽ الله جي علم سڀ ڪنهن شيء کي پنهنجي گهيري ۾ وٺي رکيو آهي.(علامه علي خان ابڙو)

الله تعالى اهو آهي، جنهن سَتَ آسمان ۽ انهن جيتريون زمينون پيدا ڪيون آهن. انهن سڀني ۾ الله جو حڪم جاري آهي بيشڪ الله تعالى هر شيءِ تي قادر آهي، ۽ بيشڪ تحقيق الله تعالى هر شيءِ جي علم کي احاطو ڪندڙ آهي(علامه عبدالوحيد جان سرهندي)

خدا اهو آهي جنهن ست آسمان بنايا آهن ۽ انهن جي برابر زمين به انهن ۾ خدا جو حڪم نازل ٿيندو رهندو آهي جيئن اوهين ڄاڻو ته خدا هر شيءَ تي قادر آهي، ۽ بيشڪ خدا پنهنجي علم سان هر شيءِ تي حاوي آهي.(سيد فرمان علي)

الله اهو آهي جنهن پيدا ڪيا ست آسمان ۽ زمين مان انهن جي مثل لهي ٿو امر انهن جي وچ ۾ تانته ڄاڻو ته بيشڪ الله هر شيءِ تي قادر آهي ۽ بيشڪ الله تحقيق گهيراء ڪيائين هر شيءِ کي علم سان .(مولانا محمد ادريس ڏاهري)

الله اهو آهي جنهن ست آسمان بنايا آهن ۽ انهن جهڙي زمين به. انهن جي وچ ۾ حڪم نازل ٿيندو ته اوهين ڄاڻو ته الله سڀ شيءِ تي قدرت وارو آهي. ۽ الله جي علم سڀ ڪنهن شيءِ کي گهيرو ڪيو آهي. (مولانا محمد مدني)